Rockeg. Rotzeg. Ruppeg. De "Jickeclub" ass eng nei Formatioun ronderëm de Songwriter Serge Tonnar. Mam Serge op der elektrescher Gittar, dem Rom "Wäissen" Christnach um Bass an dem Dirk Kellen op der Battri bilden si wat een e "power trio" nennt, eng Zort Rockband déi um Enn vun den 1960er Joren opkoum.

De Grupp huet sech gegrënnt no enger Aluedung fir e Concert um Glacis fir den Trounwiessel, de 4. Oktober 2025. Wärend 2 Méint hunn si e Programm vu 40 Minutten ageprouft an nei Arrangementer vum Serge senge Lidder gemaach. De Concert ass a leschter Minutt ofgesot ginn a reegelrecht an d'Waasser gefall.

Well déi 3 Jickefrënn awer Spaass un där neier Besetzung fonnt hunn, hunn si weider geschafft an no enger Residenz zu Gent och nei Lidder um Programm. 4 Titelen ginn et op der hausmaacher EP "Jickeclub" ze lauschteren.